Ahmedabad શહેરમાં સતત વધતી જતી ટ્રાફિકની સમસ્યા અને વિદ્યાર્થીઓની સલામતીને ધ્યાનમાં રાખીને અમદાવાદ શહેર શિક્ષણાધિકારી (DEO) દ્વારા એક અત્યંત મહત્વપૂર્ણ અને કડક પરિપત્ર બહાર પાડવામાં આવ્યો છે.
હવે અમદાવાદની તમામ શાળાઓમાં હેલ્મેટ અને લાયસન્સ વગર આવતા વાહનોને એન્ટ્રી મળશે નહીં. આ સાથે જ સગીર (માઇનોર) વિદ્યાર્થીઓ દ્વારા વાહન ચલાવવા પર પણ સંપૂર્ણ પ્રતિબંધ મૂકી દેવામાં આવ્યો છે.
Ahmedabad: કેમ લેવાયો આ નિર્ણય?
છેલ્લા કેટલાક સમયથી અમદાવાદની શાળાઓમાં આવતા વિદ્યાર્થીઓ લાયસન્સ અને હેલ્મેટ વગર, ઓવરસ્પીડમાં વાહનો ચલાવતા હોવાની ફરિયાદો સામે આવી રહી હતી. બેફામ વાહન ચલાવવા અને ટ્રાફિક નિયમોના ભંગના કારણે અનેક ગંભીર અકસ્માતો અને વિદ્યાર્થીઓ ઈજાગ્રસ્ત થવાની ઘટનાઓ બની છે.
આ સ્થિતિને ગંભીરતાથી લઈને DEO ઓફિસે શાળા સંચાલકો અને આચાર્યોને કડક અમલવારી કરવા સૂચના આપી છે.
Ahmedabad: પરિપત્રની મુખ્ય બાબતો અને મહત્વના નિયમો
સગીરો પર પ્રતિબંધ: 18 વર્ષથી નાની વયના અથવા માન્ય લાયસન્સ ન ધરાવતા સગીર વિદ્યાર્થીઓ શાળાએ વાહન લાવી શકશે નહીં.
હેલ્મેટ ફરજિયાત: લાયસન્સ ધરાવતા વિદ્યાર્થીઓ માટે પણ હેલ્મેટ પહેરવું અનિવાર્ય રહેશે. હેલ્મેટ વગર શાળાના ગેટમાં પ્રવેશ નહીં મળે.
શાળા સંચાલકોને સૂચના: શાળાના પ્રવેશદ્વાર પર જ વાહનોનું ચેકિંગ કરવા અને નિયમભંગ કરનાર વિદ્યાર્થીઓને વાહન સાથે અંદર ન આવવા દેવા આચાર્યોને આદેશ કરાયો છે.
Ahmedabad: આગામી 7 દિવસમાં યોજાશે જાગૃતિ કાર્યક્રમો
ટ્રાફિક નિયમોના પાલન અને રોડ સેફ્ટી અંગે વિદ્યાર્થીઓ માહિતગાર થાય તે માટે અમદાવાદની શાળાઓમાં આગામી 7 દિવસ દરમિયાન ‘રોડ સેફ્ટી અને ટ્રાફિક જાગૃતિ કાર્યક્રમ’ યોજવામાં આવશે. જેમાં વિદ્યાર્થીઓને ટ્રાફિક સાઇન, ડ્રાઇવિંગના નિયમો અને રોડ સેફ્ટીનું મહત્વ સમજાવવામાં આવશે.
તમામ વાલીઓને પણ અપીલ કરવામાં આવી છે કે તેઓ પોતાના સગીર બાળકોને વાહન આપવાનું ટાળે અને બાળકની સુરક્ષાને પ્રાથમિકતા આપે.
